’’انف از انف‘‘ اب وقت آگیا کے پی حکومت کا مکو ٹھپ دینا چاہئے: بیرسٹرعقیل

وزیرِ مملکت برائے قانون بیرسٹر عقیل ملک نے خیبر پختونخوا کی امن و امان کی صورتِ حال پر سخت موقف اپناتے ہوئے کہا ہے کہ “انف از انف” (اب بس بہت ہو چکا)، اور وقت آ گیا ہے کہ صوبائی حکومت کا مکمل خاتمہ کر کے وہاں آئینی قدم اٹھایا جائے۔ نجی ٹی وی چینل کے پروگرام ‘ٹونائٹ ود ثمر عباس’ میں گفتگو کرتے ہوئے بیرسٹر عقیل ملک نے انکشاف کیا کہ وفاقی سطح پر خیبر پختونخوا میں گورنر راج کے نفاذ سمیت مختلف ایمرجنسی آپشنز سنجیدگی سے زیرِ غور ہیں۔

وزیرِ مملکت کا کہنا تھا کہ تحریکِ انصاف کے احتجاجی مارچ سے قطعِ نظر، وفاقی حکومت کے لیے اس وقت اصل تشویشناک مسئلہ خیبر پختونخوا میں بدامنی اور دہشت گردی کی بڑھتی ہوئی لہر ہے۔ انہوں نے اعداد و شمار بتاتے ہوئے تشویش ظاہر کی کہ سال 2026ء میں اب تک 2500 سے زائد دہشت گردی کے واقعات پیش آ چکے ہیں، جن میں اوسطاً روزانہ سیکیورٹی فورسز کے 2 جوان شہید ہو رہے ہیں۔ ان کا کہنا تھا کہ ایسی تشویشناک صورتِ حال میں صوبائی حکومت کی ناکامی کے بعد سخت آئینی فیصلے ناگزیر ہو چکے ہیں۔