کلوروفارم کیمیکل کی عمومی درآمد پر پابندی عائد

اسلام آباد: وفاقی حکومت نے کلوروفارم کیمیکل کی عمومی درآمد پر پابندی عائد کرتے ہوئے امپورٹ پالیسی آرڈر 2022 میں باقاعدہ ترمیم کر دی ہے، جس کا نوٹیفکیشن جاری کر دیا گیا ہے۔

نوٹیفکیشن کے مطابق اب کلوروفارم صرف فارماسیوٹیکل کمپنیوں درآمد کر سکیں گی، تاہم اس کے لیے ڈرگ ریگولیٹری اتھارٹی آف پاکستان (DRAP) سے این او سی حاصل کرنا لازمی ہوگا۔

حکام کے مطابق یہ فیصلہ کابینہ کی اقتصادی رابطہ کمیٹی (ECC) کی منظوری کے بعد کیا گیا، جس کا مقصد اس خطرناک کیمیکل کے غلط استعمال کی روک تھام ہے۔

سرکاری ذرائع کا کہنا ہے کہ کلوروفارم انسانی صحت اور ماحولیات دونوں کے لیے نقصان دہ ثابت ہو سکتا ہے، اسی لیے درآمدی قوانین کو سخت کیا گیا ہے تاکہ اس کے غیر قانونی اور غیر ضروری استعمال پر قابو پایا جا سکے۔