آزاد کشمیر انتخابات: چیف الیکشن کمشنر کا ووٹرز کے نام پیغام جاری

آزاد جموں و کشمیر قانون ساز اسمبلی کے انتخابات کے سلسلے میں چیف الیکشن کمشنر جسٹس (ر) غلام مصطفیٰ مغل نے عوام کے نام ایک اہم پیغام جاری کرتے ہوئے تمام ووٹرز سے اپنا حقِ رائے دہی لازمی استعمال کرنے کی اپیل کی ہے۔

اپنے پیغام میں چیف الیکشن کمشنر نے بتایا کہ انتخابات کے دوسرے مرحلے میں مظفرآباد ڈویژن کی 9 اور مہاجرین مقیم پاکستان کی 12 نشستوں پر ووٹنگ ہوگی۔ انہوں نے واضح کیا کہ نیلم، جہلم ویلی اور مہاجرین کی نشستوں کے تمام پولنگ اسٹیشنز پر انتخابی سامان کی ترسیل مکمل ہو چکی ہے، جبکہ مظفرآباد کے 5 حلقوں میں پولنگ میٹریل کی ترسیل آخری مرحلے میں ہے۔ تمام پولنگ عملہ سخت سیکیورٹی کے تحت متعلقہ پولنگ اسٹیشنز کی جانب روانہ ہو رہا ہے۔

جسٹس (ر) غلام مصطفیٰ مغل نے پرامن، شفاف اور منصفانہ انتخابات کے انعقاد کا یقین دلاتے ہوئے شہریوں پر زور دیا کہ وہ جمہوری عمل میں بھرپور شرکت کریں۔ انہوں نے کہا کہ ووٹ ایک قومی امانت ہے جس کا کوئی متبادل نہیں، لہٰذا تمام شہری اپنے ووٹ کی طاقت سے دیانتدار اور اہل قیادت کا انتخاب کر کے ایک ذمہ دار شہری ہونے کا ثبوت دیں