ہم کراچی والے تمغوں کے حقدار ہیں: عائشہ عمر

برطانوی تحقیقی ادارے ’دی اکانومسٹ انٹیلی جنس یونٹ‘ (EIU) نے سال 2026 کا ’گلوبل لائیویبلٹی انڈیکس‘ جاری کیا ہے، جس میں رہائش کے اعتبار سے دنیا کے 173 شہروں کی فہرست میں کراچی کو 170 ویں نمبر پر رکھا گیا ہے، یعنی کراچی دنیا کا چوتھا بدترین رہائشی شہر قرار پایا ہے۔ اس رپورٹ کے سامنے آنے کے بعد معروف پاکستانی اداکارہ، ماڈل اور گلوکارہ عائشہ عمر نے کراچی کے ناقص بنیادی ڈھانچے اور ابتر صورتحال پر گہری تشویش کا اظہار کیا ہے۔

عائشہ عمر نے انسٹاگرام اسٹوری کے ذریعے اپنے خیالات کا اظہار کرتے ہوئے لکھا کہ “ہمیں اس رپورٹ پر کوئی حیرت نہیں ہوئی۔” انہوں نے شہر کی تلخ حقیقتوں کو بیان کرتے ہوئے کہا کہ کراچی کے رہائشی اس شہر میں رہنے، سانس لینے اور روزمرہ کے حالات کا مقابلہ کرنے پر باقاعدہ تمغوں کے حقدار ہیں۔

اداکارہ نے شہر کے مسائل پر کھل کر بات کرتے ہوئے مزید لکھا کہ کراچی کے شہری روزانہ ٹوٹی پھوٹی اور آلودہ سڑکوں پر سفر کرتے ہیں، ٹریفک جام میں گھنٹوں پھنسے رہتے ہیں، اور گھروں میں گیس و بجلی کی شدید قلت کا سامنا کرتے ہیں۔ اس کے ساتھ ساتھ ہر وقت لوٹ مار اور اسٹریٹ کرائم کا خوف ان کے سروں پر منڈلاتا رہتا ہے۔ انہوں نے افسوس کا اظہار کیا کہ سخت محنت کے بعد تمام ٹیکسوں کی بروقت ادائیگی اور ملکی معیشت میں سب سے بڑا حصہ ڈالنے کے باوجود، کراچی کے عوام ہر وقت ’لڑو یا بھاگو‘ (Flight-or-Fight) جیسی شدید ذہنی اور اعصابی کیفیت میں زندگی گزارنے پر مجبور ہیں۔