شہید آیت اللہ علی خامنہ ای کی آخری رسومات ایران اور عراق میں ہوں گی

ایران کے شہید سپریم لیڈر آیت اللہ علی خامنہ ای کی آخری رسومات اور تدفین کے لیے ایران اور عراق کے پانچ بڑے شہروں میں تمام تر تیاریاں مکمل کر لی گئی ہیں۔ اس تاریخی اور بڑے اجتماع کی سکیورٹی کے پیشِ نظر ایرانی مسلح افواج کو انتہائی ہائی الرٹ پر رکھ دیا گیا ہے۔

ایرانی حکام کی جانب سے جاری کردہ شیڈول کے مطابق، ہفتے کے روز تہران کے گرینڈ مصلیٰ میں عوام کو اپنے قائد کے آخری دیدار کا موقع دیا جائے گا، جس کے بعد پیر کے روز تہران میں مرکزی جنازے کا عظیم الشان جلوس نکالا جائے گا۔ تہران میں رسومات کی ادائیگی کے بعد میت کو مقدس شہر قم اور پھر وہاں سے عراقی شہروں نجف اور کربلا لے جایا جائے گا۔ تمام شہروں سے گزارنے کے بعد، 9 جولائی کو شہید سپریم لیڈر کی ان کے آبائی شہر مشہد مقدس میں تدفین عمل میں آئے گی۔

عسکری و حکومتی ذرائع کے مطابق، تعزیتی تقریبات اور نمازِ جنازہ میں ڈیڑھ کروڑ سے دو کروڑ (15 سے 20 ملین) افراد کی شرکت متوقع ہے۔ عالمی سطح پر روس، چین اور پاکستان سمیت 30 سے زائد ممالک کے اعلیٰ ترین حکام اور دنیا بھر کے 90 ممالک سے تعلق رکھنے والے ممتاز مذہبی رہنما بھی جنازے اور آخری رسومات میں شریک ہوں گے۔

ترجمان ایرانی مسلح افواج، بریگیڈیئر جنرل محمد اکرمینیا نے میڈیا کو بتایا کہ غیر ملکی سربراہانِ مملکت اور مذہبی شخصیات کی آمد کے پیشِ نظر فوج مکمل الرٹ ہے۔ انہوں نے واضح کیا کہ ایران کی بری، بحری اور فضائی افواج نے ملکی سرحدوں پر اپنی تعیناتی اور گشت میں نمایاں اضافہ کر دیا ہے، جبکہ ملکی فضائی دفاعی نظام (Air Defense System) چوبیس گھنٹے فضائی حدود کی کڑی نگرانی کر رہا ہے تاکہ کسی بھی ناخوشگوار واقعے سے نمٹا جا سکے۔