عتیقہ اوڈھو نامور ہدایت کار کو یاد کرکے آبدیدہ ہوگئیں

پاکستان شوبز انڈسٹری کی مایہ ناز اور سینئر اداکارہ عتیقہ اوڈھو نے  ایک ٹاک شو میں شرکت کے دوران ماضی کے نامور ہدایت کار مرحوم اقبال کشمیری کو یاد کرتے ہوئے جذباتی ہو گئیں اور ان کی آنکھوں میں آنسو آ گئے۔ شو کے دوران جب اقبال کشمیری کی ہدایت کاری میں بننے والی ان کی ایک پرانی فلم کا ویڈیو کلپ چلایا گیا، تو عتیقہ اوڈھو اپنے جذبات پر قابو نہ رکھ سکیں اور آبدیدہ ہو کر کہا کہ “ان گانوں کو چلا کر آپ مجھے رلا دیں گے کیونکہ انہوں نے مجھے اقبال کشمیری کی یاد دلا دی ہے۔”

اداکارہ نے ماضی کے دنوں کو یاد کرتے ہوئے بتایا کہ انہوں نے مرحوم اقبال کشمیری کے ساتھ سپر ہٹ فلموں ‘جو ڈر گیا وہ مر گیا’ اور ‘ممی’ میں کام کیا تھا۔ انہوں نے اعتراف کیا کہ اگرچہ فلم ‘ممی’ باکس آفس پر زیادہ کامیاب نہیں ہو سکی تھی، لیکن اس کی شوٹنگ سے جڑی ان کی بہت سی خوبصورت یادیں ہیں۔ عتیقہ اوڈھو نے مسکراتے ہوئے ایک قصہ سنایا کہ “میں بیگ صاحب کے سامنے اقبال کشمیری کو بہت تنگ کیا کرتی تھی کیونکہ مجھے اس وقت ڈانس کرنا نہیں آتا تھا۔ اقبال صاحب کو اپنی ڈائریکشن اور اداکاری سے اس قدر محبت تھی کہ وہ مجھے سکھانے کے لیے خود ڈانس کر کے دکھاتے تھے۔” اداکارہ نے گہرے دکھ کا اظہار کرتے ہوئے مزید کہا کہ جب بھی وہ ان کے انتقال کے بارے میں سوچتی ہیں، ان کا دل بھر آتا ہے، کیونکہ وہ اپنے کام کے لیے ناقابل یقین حد تک جنونی اور مخلص انسان تھے