مجھے آج تک نہیں معلوم کہ میں کامیاب کیسے ہوا: عاطف اسلم

پاکستان کے عالمی شہرت یافتہ اور محبوب گلوکار عاطف اسلم نے اپنی فنکارانہ کامیابی اور موسیقی کے سفر پر روشنی ڈالتے ہوئے انکشاف کیا ہے کہ انہیں خود بھی آج تک یہ معلوم نہیں ہو سکا کہ وہ کس طرح اس قدر کامیاب ہوئے۔ انہوں نے اپنی شہرت کو محنت کے بجائیک محض اللہ تعالیٰ کا خاص کرم اور فضل قرار دیا ہے۔

سوشل میڈیا پر 11 ملین (1 کروڑ 10 لاکھ) سے زائد فالوورز رکھنے والے عاطف اسلم، جنہوں نے ’عادت‘، ’کچھ اس طرح‘، ’بخدا‘ اور ’دل دیاں گلاں‘ جیسے شہرہ آفاق گانوں سے دنیا بھر میں لاکھوں دلوں پر راج کیا، حال ہی میں بھارت کے ایک معروف یوٹیوب چینل کو دیے گئے انٹرویو میں اپنے فنی سفر پر کھلم کھلا گفتگو کر رہے تھے۔

انہوں نے بتایا کہ پہلے گانے کی کامیابی کے بعد فنکار اگلے قدم کے بارے میں سوچتا ہے، جبکہ البم کی ریلیز کے بعد ذمہ داریوں کا بوجھ مزید بڑھ جاتا ہے۔ موسیقی سے کنارہ کشی کے سوال پر عاطف اسلم نے واضح کیا کہ انہوں نے کبھی میوزک چھوڑنے کا نہیں سوچا۔ البتہ تخلیقی جمود (Creative Block) کے بارے میں بات کرتے ہوئے انہوں نے کہا کہ ایک فنکار کے لیے کبھی کبھار خود کو خالی محسوس کرنا بھی ترقی کے سفر کا اہم حصہ ہے، جس کے بعد وہ دوبارہ شکر گزاری کے ساتھ تخلیقی عمل کی طرف لوٹتا ہے۔