عاطف اسلم کی کیفے میں نماز ادا کرتے ویڈیو وائرل

پاکستان کے عالمی شہرت یافتہ گلوکار عاطف اسلم کی ایک ویڈیو سوشل میڈیا پر تیزی سے وائرل ہو رہی ہے، جس میں انہیں ایک کیفے کے اندر پرسکون انداز میں نماز ادا کرتے ہوئے دیکھا جا سکتا ہے۔ عاطف اسلم کی اس ویڈیو نے انٹرنیٹ صارفین کی توجہ فوری طور پر اپنی جانب مبذول کرا لی ہے اور سوشل میڈیا پر اس پر بحث چھڑ گئی ہے۔ بیشتر صارفین نے ان کے اس عمل کو سراہتے ہوئے اسے دین سے وابستگی اور مصروفیت کے باوجود مذہبی فرائض کو ترجیح دینے کی ایک خوبصورت مثال قرار دیا ہے۔ دوسری جانب، کچھ صارفین نے اس پر تنقید کرتے ہوئے اسے محض تشہیر یا دکھاوا قرار دیا، تاہم مداحوں کی بڑی تعداد نے اس تنقید کو مسترد کرتے ہوئے مؤقف اپنایا ہے کہ کسی کی نیت پر شک کرنا مناسب نہیں اور ویڈیو سے واضح ہے کہ وہ کیمرے کے لیے نہیں بلکہ معمول کے مطابق عبادت کر رہے ہیں۔