امریکا کی پاکستان کو ریل انجن فراہمی اور معدنی وسائل میں تعاون کی پیشکش

امریکی انتظامیہ نے پاکستان کو امریکی ساختہ لوکوموٹیوز (ریل انجن) فروخت کرنے اور ملک میں موجود معدنی وسائل کے شعبے میں تعاون کی پیشکش کی ہے۔ سرکاری ذرائع کے مطابق یہ بات چیت دو ماہ قبل وزیرِ خزانہ محمد اورنگزیب کے واشنگٹن دورے کے دوران آئی ایم ایف کے سالانہ اجلاس کے موقع پر ہوئی۔

ذرائع کے مطابق امریکی خصوصی معاونین ریمونڈ ایموری کاکس اور رکی گِل نے پاکستانی وفد سے ملاقات میں امریکی تجارتی مفادات کے تحفظ کو ٹرمپ انتظامیہ کی ترجیح قرار دیا۔ رکی گِل نے پاکستان سے امریکی لوکوموٹیوز کی خریداری کے لیے حمایت کی درخواست کی، جس کے لیے ٹینڈر پہلے ہی جاری کیا جا چکا ہے۔

ذرائع کا کہنا ہے کہ پاکستان ریلویز اس وقت مالی مشکلات کا شکار ہے اور موجودہ لوکوموٹیوز کی مرمت و بحالی پر انحصار کر رہا ہے، جبکہ حال ہی میں 100 ڈیزل الیکٹرک لوکوموٹیوز کی مرمت کے منصوبے کی لاگت بڑھا کر 16 ارب روپے کر دی گئی ہے۔