جونیئر اداکار کو کھانے سے روکنے پر اکشے کھنہ پروڈیوسر پر پھٹ پڑے تھے: امیت بہل کا انکشاف

بالی وڈ کے ورسٹائل اداکار اکشے کھنہ اپنی سنجیدہ اداکاری کے ساتھ ساتھ اپنی اصول پسندی اور ساتھی فنکاروں کے لیے ہمدردانہ رویے کی وجہ سے بھی جانے جاتے ہیں۔ حال ہی میں سینئر اداکار امیت بہل نے ایک پرانا واقعہ شیئر کرتے ہوئے بتایا کہ کس طرح اکشے کھنہ ایک غریب اور جونیئر اداکار کی تذلیل پر پروڈیوسر کے خلاف ڈٹ گئے تھے۔امیت بہل کے مطابق، ایک فلم کی شوٹنگ کے دوران ایک کریکٹر آرٹسٹ (جو الگ ہوٹل میں مقیم تھا) دوپہر کے کھانے کے لیے اس ہوٹل میں آیا جہاں مرکزی کاسٹ ٹھہری ہوئی تھی۔ جیسے ہی اس اداکار نے کھانا شروع کیا، پروڈکشن ٹیم اور پروڈیوسر کے اہل خانہ نے اسے یہ کہہ کر روک دیا کہ “وہ یہاں کا حصہ نہیں ہے اور اسے یہ کھانا نہیں کھانا چاہیے”۔امیت بہل بتاتے ہیں کہ جب اس اداکار کو کھانے سے روکا گیا تو وہ دل برداشتہ ہو کر خاموشی سے پلیٹ رکھ کر ایک طرف بیٹھ گیا۔ اکشے کھنہ نے یہ منظر دیکھا اور ان کا پارہ ہائی ہو گیا۔اکشے نے فوراً مداخلت کی اور عملے اور پروڈیوسر پر برس پڑے۔ انہوں نے سخت لہجے میں کہا، “بھوک اور عزت کا اصل مطلب کیا ہے؟ فلم پلیٹوں یا کھانے کی مقدار سے نہیں بنتی، بلکہ لوگوں کی دعاؤں سے بنتی ہے۔”

امیت بہل کا کہنا تھا کہ اس واقعے نے سیٹ پر موجود تمام لوگوں کو حیران کر دیا اور انہیں اندازہ ہوا کہ اکشے کھنہ انسانیت اور ساتھیوں کی عزتِ نفس کے معاملے میں کتنے حساس ہیں۔ اس واقعے کے بعد نہ صرف اس اداکار کو عزت کے ساتھ کھانا کھلایا گیا بلکہ سیٹ پر موجود تفریق کو بھی ختم کیا گیا۔