آزاد کشمیر اسمبلی میں ٹروتھ اینڈ ری کنسلی ایشن کمیشن کے قیام کی قرارداد منظور

آزاد جموں و کشمیر قانون ساز اسمبلی کا اہم اجلاس اسپیکر نبیلہ ایوب کی زیرِ صدارت منعقد ہوا، جس میں پاکستان پیپلز پارٹی (PPP) کے رہنما چودھری یاسین کی جانب سے خطے کی موجودہ صورتحال پر ‘ٹروتھ اینڈ ری کنسلی ایشن کمیشن’ کے قیام کے لیے پیش کی گئی قرارداد کو ایوان نے متفقہ طور پر منظور کر لیا ہے۔ قرارداد میں حالیہ واقعات کی غیر جانبدارانہ تحقیقات، تمام معلومات تک رسائی اور پورے۔اختیارات کے ساتھ انکوائری کمیشن کی تشکیل کا مطالبہ کیا گیا ہے۔ ایوان نے مظاہرین سے رپورٹ کی تیاری تک احتجاج ختم کرنے، ریاست میں انٹرنیٹ سروس فوری بحال کرنے اور پرامن شہریوں کو مسلح عناصر سے الگ رہنے کی اپیل کی۔ اس کے علاوہ اسمبلی نے سیکیورٹی فورسز کی قربانیوں کو خراجِ تحسین پیش کرتے ہوئے امن و امان خراب کرنے والوں کے خلاف قانونی کارروائی کا اعادہ کیا۔