عینک والا جن‘ اینیمیٹڈ فلم پر تنازع، خراب اے آئی معیار کے بعد اصل تخلیق کاروں کا اظہار لاتعلقی

پاکستان ٹیلی وژن (PTV) کے تاریخ ساز ڈرامے ’عینک والا جن‘ پر مبنی 85 منٹ دورانیے کی فیچر اینیمیٹڈ فلم 24 جولائی کو ملک بھر کے سینما گھروں میں نمائش کے لیے پیش کی گئی، جسے پاکستان کی پہلی مصنوعی ذہانت (AI) سے تیار کردہ فلم قرار دیا گیا ہے۔ تاہم فلم کی ریلیز کے فوراً بعد اس کے ویژول معیار اور اے آئی خامیوں پر شدید تنقید کا سلسلہ شروع ہو گیا ہے، جبکہ صارفین نے گوگل جیمنائی (Google Gemini) کے واٹرمارک اور املا کی غلطیوں کی نشاندہی بھی کی ہے۔ اس تنازع میں اس وقت مزید شدت آئی جب اے آئی پروڈکشن ہاؤس ‘ریل وِنڈ’ (Reelwind) نے سوشل میڈیا پر وضاحتی بیان جاری کرتے ہوئے پی ٹی وی پر الزام عائد کیا کہ اس پروجیکٹ پر 10 ماہ تک پی ٹی وی سے رابطے میں رہنے کے باوجود انہیں مکمل طور پر نظر انداز کر کے فلم کسی اور سے تیار کروائی گئی۔