کراچی کی موجودہ سیکیورٹی صورتحال کو مزید بہتر بنانے کیلئے مربوط اور مؤثر اقدامات پر اتفاق

ہیڈ کوارٹرز سندھ رینجرز میں ڈی جی رینجرز سندھ کی زیر صدارت اہم سیکیورٹی کانفرنس منعقد ہوئی جس میں کمشنر کراچی، ایڈیشنل آئی جی، ایڈیشنل آئی جی سی ٹی ڈی، پولیس، رینجرز اور حساس اداروں کے اعلیٰ افسران نے شرکت کی۔

ترجمان سندھ رینجرز کے مطابق اجلاس میں کراچی کی مجموعی امن و امان کی صورتحال اور سیکیورٹی انتظامات کا تفصیلی جائزہ لیا گیا۔ شرکاء نے صوبے خصوصاً کراچی کی موجودہ سیکیورٹی صورتحال کو مزید بہتر بنانے کیلئے مربوط اور مؤثر اقدامات پر اتفاق کیا۔اجلاس میں قانون نافذ کرنے والے اداروں کو دہشت گردوں اور شرپسند عناصر کے خلاف مشترکہ آپریشن مزید مؤثر بنانے کی ہدایات جاری کی گئیں، جبکہ شہر کے داخلی و خارجی راستوں پر چیکنگ سخت کرنے کے بھی احکامات دیے گئے۔حساس تنصیبات کی سیکیورٹی یقینی بنانے، سرچ اور کومبنگ آپریشنز کے علاوہ انٹیلی جنس بیسڈ آپریشنز (IBOs) میں اضافے پر بھی زور دیا گیا۔ بھتہ خوری، غیر قانونی اسلحے کی ترسیل اور دیگر جرائم کے خلاف کارروائیوں کو مزید تیز کرنے کیلئے لائحہ عمل تشکیل دیا گیا۔اجلاس میں غیرتصدیق شدہ بھتہ خوری رپورٹس کے سدباب اور عادی مجرموں کے خلاف کارروائیاں مؤثر بنانے پر بھی غور کیا گیا۔عوام سے اپیل کی گئی کہ کسی بھی مشکوک شخص، سرگرمی یا ناخوشگوار واقعے کی فوری اطلاع قریبی رینجرز اہلکاروں، رینجرز ہیلپ لائن یا رینجرز واٹس ایپ نمبر 0347-9001111 پر دیں