ایبٹ آباد میں طوفانی بارش، 3 بچیاں برساتی ندی میں بہہ گئیں، 2 کی لاشیں برآمد

خیبر پختونخوا کے ضلع ایبٹ آباد میں طوفانی بارشوں نے شدید تباہی مچا دی ہے، جس کے باعث ندی نالوں میں طغیانی آ گئی اور شہر کا بنیادی ڈھانچہ بری طرح متاثر ہوا۔ ایک انتہائی افسوسناک واقعے میں اسکول سے گھر واپس جاتے ہوئے چہلہ برساتی ندی عبور کرتی ہوئی 3 بچیاں پانی کے تیز بہاؤ میں بہہ گئیں۔ ریسکیو ٹیموں نے 2 بچیوں کی لاشیں برآمد کر لی ہیں جبکہ تیسری کی تلاش جاری ہے۔ شدید بارش کے باعث شاہراہِ ریشم، بلال ٹاؤن، حسن ٹاؤن اور نیازی کالونی سمیت متعدد رہائشی علاقوں اور سڑکوں پر پانی جمع ہو گیا، جس سے گھروں میں پانی داخل ہونے کی وجہ سے شہریوں کا قیمتی سامان اور گاڑیاں خراب ہو گئیں۔ علاوہ ازیں، بیرن گلی میں اسکول کی عمارت منہدم ہو گئی اور بالائی علاقوں میں لینڈ سلائیڈنگ کے باعث متعدد راستے بند اور بجلی کے پول گرنے سے فراہمیِ معطل ہو گئی ہے۔ ضلعی انتظامیہ نے شہریوں کو ندی نالوں سے دور رہنے اور غیر ضروری سفر سے گریز کرنے کی ہدایت کی ہے۔