عامر خان نے تیسری شادی کے بعد ایک اور اہم فیصلہ کرلیا

بالی ووڈ کے سدا بہار سپر اسٹار عامر خان نے اپنی تیسری شادی کے بعد خاندانی یکجہتی کے لیے ایک اور بڑا قدم اٹھانے کا فیصلہ کیا ہے۔ بھارتی میڈیا رپورٹس کے مطابق، عامر خان نے حال ہی میں اپنی دیرینہ دوست اور بزنس پارٹنر گوری سپراٹ کے ساتھ ایک سادہ تقریب میں شادی رچائی ہے، جس کے بعد اب وہ ممبئی کے پوش علاقے پالی ہل میں ایک منفرد اور پرتعیش رہائشی منصوبہ شروع کرنے جا رہے ہیں۔ اس منصوبے کا مقصد خاندان کے تمام افراد کو ایک ہی چھت تلے جمع کرنا ہے۔ ذرائع کے مطابق، عامر خان ممبئی میں واقع ‘بیلا وسٹا’ اور ‘مرینا اپارٹمنٹس’ نامی دو ملحقہ عمارتوں کو ازسرِ نو تعمیر کروا کے ایک وسیع “اسکائی ولا” (Sky Villa) میں تبدیل کر رہے ہیں، جس کے لیے وہ 100 کروڑ بھارتی روپے سے زائد کی خطیر سرمایہ کاری کر چکے ہیں۔ اس ولا میں عامر خان، ان کی نئی اہلیہ گوری سپراٹ، بیٹے جنید خان، والدہ زینت حسین اور بہنوں کے لیے علیحدہ علیحدہ فلورز مختص ہوں گے، جبکہ دلچسپ بات یہ ہے کہ اس منصوبے میں ان کی سابقہ اہلیہ کرن راؤ اور بیٹے آزاد کے لیے بھی ایک اپارٹمنٹ مختص کیے جانے کا قوی امکان ہے۔