امریکی نائب صدر جے ڈی وینس کے اوہائیو میں واقع گھر میں توڑ پھوڑ،

امریکی نائب صدر جے ڈی وینس کے اوہائیو میں واقع نجی رہائش گاہ میں توڑ پھوڑ کا واقعہ پیش آیا ہے، جس کے بعد وفاقی تحقیقاتی ادارے ایف بی آئی نے تحقیقات کا آغاز کر دیا ہے۔

امریکی میڈیا رپورٹس کے مطابق ایف بی آئی نے واقعے میں ملوث ایک مشتبہ شخص کو گرفتار کر لیا ہے، جبکہ واقعے کے محرکات جاننے کے لیے مختلف پہلوؤں سے تفتیش جاری ہے۔

رپورٹس میں بتایا گیا ہے کہ واقعے کے وقت جے ڈی وینس اور ان کی اہلیہ گھر پر موجود نہیں تھے۔ حملہ آور نے گھر کی کھڑکی توڑ دی تاہم وہ اندر داخل ہونے میں ناکام رہا۔

حکام کے مطابق واقعے میں کسی جانی نقصان کی اطلاع نہیں ملی، جبکہ سکیورٹی صورتحال اور حفاظتی انتظامات کا بھی جائزہ لیا جا رہا ہے۔ مزید تحقیقات مکمل ہونے کے بعد تفصیلات جاری کیے جانے کا امکان ہے۔