پی آئی اے کی نجکاری کی بڑی پیش رفت، 135 ارب روپے کی بولی کی توثیق

نائب وزیراعظم و وزیر خارجہ اسحاق ڈار کی زیر صدارت کابینہ کمیٹی برائے نجکاری (CCoP) کا اجلاس منعقد ہوا، جس میں پاکستان انٹرنیشنل ایئرلائن (پی آئی اے) کی نجکاری کے آئندہ لائحہ عمل پر اہم فیصلے کیے گئے۔

اجلاس میں وزارتِ نجکاری کے سیکریٹری نے پی آئی اے کی نجکاری سے متعلق تفصیلی بریفنگ دی۔ کابینہ کمیٹی نے اے ایچ سی کی قیادت میں کنسورشیم کی جانب سے دی گئی 135 ارب روپے کی بولی کی توثیق کر دی، جو پی آئی اے کے 75 فیصد حصص کی فروخت کے لیے منظور کی گئی ہے۔

کمیٹی نے پی آئی اے کی نجکاری کی منظوری کابینہ کو بھیجنے کی سفارش بھی کر دی۔ اس موقع پر نائب وزیراعظم اسحاق ڈار نے نجکاری کا عمل بروقت مکمل کرنے کی ہدایت کرتے ہوئے امید ظاہر کی کہ نجکاری کے بعد پی آئی اے اپنے سنہرے دن دوبارہ حاصل کرے گی۔

اجلاس میں وزیر توانائی، وزیراعظم کے مشیران اور خصوصی معاونین کے علاوہ سیکریٹری کابینہ، دفاع، قانون، توانائی، صنعت و پیداوار اور نجکاری کمیشن کے اعلیٰ حکام نے شرکت کی۔

کابینہ کمیٹی نے پی آئی اے کی نجکاری کو ملکی معیشت کے لیے اہم قدم قرار دیتے ہوئے کہا کہ حکومت سرکاری اداروں میں اصلاحات کے عمل کو مزید تیز کرنے کے لیے پُرعزم ہے۔