سپریم کورٹ نے ٹرمپ کی شکاگو میں نیشنل گارڈ تعیناتی کی درخواست مسترد کر دی

امریکا کی سپریم کورٹ نے صدر ڈونلڈ ٹرمپ کی شکاگو میں نیشنل گارڈ تعینات کرنے کی درخواست مسترد کر دی ہے۔ خبر ایجنسی کے مطابق عدالت نے واضح کیا کہ صدر قانونی شرائط پوری کیے بغیر نیشنل گارڈ کو وفاقی حیثیت میں تعینات نہیں کر سکتے۔

واضح رہے کہ شکاگو کی ضلعی عدالت کے جج اپریل پیری نے 10 اکتوبر کو عارضی حکم نامہ جاری کرتے ہوئے نیشنل گارڈ کی تعیناتی مسترد کر دی تھی، جس کے خلاف وزارتِ انصاف نے سپریم کورٹ میں اپیل دائر کی تھی۔

صدر ٹرمپ نے اس سے قبل شکاگو اور پورٹ لینڈ میں فوجی دستے بھیجنے کا حکم دیا تھا۔ ٹرمپ اور ان کے اتحادیوں کا مؤقف ہے کہ ڈیموکریٹ کے زیر انتظام شہر بدامنی، جرائم اور پرتشدد احتجاج کا شکار ہیں، جبکہ ڈیموکریٹ میئرز، گورنرز اور ناقدین نے صدر پر اختیارات کے ناجائز استعمال کا الزام عائد کیا ہے۔