مقبوضہ کشمیر میں کرکٹ کے نام پر انٹرنیشنل کھلاڑیوں کیساتھ فراڈ

مقبوضہ کشمیر میں کرکٹ کے نام پر انٹرنیشنل کھلاڑیوں کے ساتھ فراڈ ہو گیا۔
میڈیا رپورٹس کے مطابق انڈین ہیون پریمیئرلیگ (آئی ایچ پی ایل) کے نام سے ٹورنامنٹ میں بین الاقوامی کھلاڑیوں کو مدعو کیا گیا جبکہ شان مارش اور شکیب الحسن نے مدعوکرنے کے باوجود ٹورنامنٹ میں شرکت سے انکار کردیا۔
رپورٹس میں بتایا گیا کہ کھلاڑیوں کو پیسوں کی ادائیگی نہ ہونے کی وجہ سے ٹورنامنٹ ملتوی کرنا پڑگیا جبکہ ٹورنامنٹ کی انتظامیہ اور لیگ کے مالکان پیسے دیئے بغیر راتوں رات غائب ہوگئے جس کے باعث ویسٹ انڈیز کے کرس گیل بھی ٹورنامنٹ بیچ میں چھوڑ کر چلے گئے۔
مقبوضہ کشمیر کے بخشی سٹیڈیم میں پہلے چند میچز کے انعقاد کے بعد حالات خراب ہوئے تاہم پولیس نے معاملے کی تحقیقات کا آغازکردیا ہے۔
میڈیا رپورٹس میں بتایا گیا ہے کہ انڈین ہیون پریمیئر لیگ 25 اکتوبر سے 8 نومبر تک کھیلی جانی تھی جس میں کھلاڑیوں کے ساتھ امپائرز اور ہوٹل مالکان کو بھی ادائیگی نہیں ہوئی۔