امریکی فضائی حدود دوبارہ کھول دی گئیں، ملک گیر گراؤنڈ اسٹاپ ختم

امریکی فیڈرل ایوی ایشن ایڈمنسٹریشن (ایف اے اے) نے متعدد ایئر ٹریفک کنٹرول مراکز میں مواصلاتی خرابی اور ’غیر معمولی حالات‘ کے باعث نافذ کیا گیا ملک گیر گراؤنڈ اسٹاپ ختم کرتے ہوئے امریکا بھر کی فضائی حدود دوبارہ کھول دی ہیں، تاہم ہزاروں پروازیں متاثر ہونے کے باعث ایئرپورٹس پر بدستور شدید افراتفری اور تعطل برقرار ہے۔ لاس اینجلس انٹرنیشنل ایئرپورٹ (ایل اے ایکس) پر پھنسے مسافروں نے عالمی میڈیا سے گفتگو کرتے ہوئے بتایا کہ پابندی اٹھائے جانے کے باوجود صورتحال معمول پر نہیں آ سکی؛ ایل سلواڈور سے آکلینڈ جانے والی مسافر پیٹریشیا لیمس نے بتایا کہ شدید بارش کے باعث ان کی پرواز کا رخ لاس اینجلس موڑا گیا جہاں وہ پروازوں کی منسوخی کے باعث پھنس کر رہ گئی ہیں اور ایئر لائن عملے نے انہیں اگلی پرواز کی معلومات کے لیے چھ گھنٹے انتظار کرنے کا کہا ہے۔ اسی طرح لندن کے راستے روم جانے والی مسافر کارلوٹا اور دیگر متعدد مسافر بھی اپنی پروازوں کی منسوخی کے خدشے اور بروقت معلومات کی عدم دستیابی کے باعث شدید ذہنی دباؤ اور بے یقینی کا شکار ہیں۔