وزیراعلیٰ پنجاب مریم نواز کا جہلم اور پنڈ دادنخان کے عوام کیلئے بڑا تحفہ

پنجاب میں 2021ء میں شروع ہونے والا 128 کلومیٹر طویل للہ جہلم روڈ منصوبہ 5 سال بعد مکمل ہو گیا ہے، جس پر وزیراعلیٰ پنجاب مریم نواز شریف نے اظہارِ تشکر کرتے ہوئے محکمہ تعمیرات و مواصلات (سی اینڈ ڈبلیو) کو شاباش دی اور جہلم پنڈ دادن خان روڈ کی جلد تکمیل کے لیے بھی ضروری اقدامات کی ہدایت جاری کر دی۔ وزیراعلیٰ کو دی گئی تفصیلی بریفنگ میں بتایا گیا کہ 13 ارب 53 کروڑ 80 لاکھ روپے کی لاگت سے مکمل ہونے والی یہ دو رویہ سڑک پنڈ دادن خان کو للہ انٹرچینج سے منسلک کرے گی، جسے پہلے کی 20 سے 24 فٹ چوڑائی سے بڑھا کر 76 فٹ تک وسیع کیا گیا ہے، جبکہ پانچ سیکشنز پر مشتمل اس منصوبے میں 4.2 کلومیٹر طویل جلالپور بائی پاس، 3.98 کلومیٹر طویل پنڈ دادن خان بائی پاس اور 185 چھوٹے پلوں کی تعمیر بھی شامل ہے۔ اس موقع پر وزیراعلیٰ مریم نواز نے کہا کہ صوبے میں پہلی مرتبہ 35 ہزار کلومیٹر طویل رابطہ سڑکوں کی تعمیر، توسیع اور بحالی سے مواصلات کی نئی تاریخ رقم کی جا رہی ہے، جس سے نہ صرف عوام کو بہترین سفری سہولتیں میسر آئیں گی بلکہ خطے میں معاشی سرگرمیوں کو بھی فروغ ملے گا۔