ملک کے مختلف شہروں میں بارش، بابوسر ٹاپ پر شدید برفباری سے راستے بند

ملک کے مختلف شہروں میں بارش اور پہاڑی علاقوں میں موسمِ سرما کی پہلی برفباری کے باعث سردی کی شدت میں نمایاں اضافہ ہو گیا ہے، جبکہ گزشتہ شام سے چلنے والی ہواؤں اور متعدد علاقوں میں ہونے والی بوندا باندی سے لاہور کی فضا میں آلودگی کی سطح کم ہو کر اوسط ایئر کوالٹی انڈیکس (اے کیو آئی) 111 تک آ گیا ہے۔ محکمہ موسمیات کے مطابق صوبائی دارالحکومت لاہور میں آج موسم ابر آلود رہنے اور دن کے مختلف اوقات میں بوندا باندی کا امکان ہے، جہاں زیادہ سے زیادہ درجہ حرارت 29 اور کم سے کم 17 ڈگری سینٹی گریڈ رہنے کی توقع ہے جبکہ ہوا میں نمی کا تناسب 70 فیصد اور ہوا کی رفتار 5 کلومیٹر فی گھنٹہ ریکارڈ کی گئی ہے، تاہم اس کے برعکس بہاولپور میں فضائی آلودگی کی صورتحال انتہائی تشویشناک ہے جہاں اے کیو آئی 520 کی خطرناک سطح تک پہنچ گیا ہے۔ دوسری جانب خیبرپختونخوا اور گلگت بلتستان میں بارش اور برفباری سے موسم شدید سرد ہو گیا ہے، اپر ہنزہ کے پہاڑوں اور خنجراب پاس پر برفباری ریکارڈ کی گئی جبکہ بابوسر ٹاپ پر شدید برفباری کے باعث بیسر سے آگے راستے بند ہونے سے دو آئل ٹینکر پھنس گئے ہیں، اور محکمہ موسمیات نے آئندہ 24 گھنٹوں کے دوران مزید بارش اور برفباری کی پیشگوئی کی ہے۔