حکومت کا سکوک بانڈز کے اجرا کیلئے ایسٹ رجسٹری کمپنی بنانے کا فیصلہ

وفاقی حکومت نے سکوک بانڈز کے اجرا کے عمل کو آسان، شفاف اور تیز بنانے کے لیے نئی ایسٹ رجسٹری کمپنی قائم کرنے کا فیصلہ کر لیا ہے۔ ذرائع وزارتِ خزانہ کے مطابق مجوزہ کمپنی سکوک کے اجرا کے لیے درکار سرکاری اور نجی اثاثوں کی رجسٹریشن، تصدیق اور نگرانی کے فرائض انجام دے گی۔ اس حوالے سے گورنر سٹیٹ بینک جمیل احمد نے گفتگو کرتے ہوئے بتایا کہ چونکہ سکوک روایتی بانڈز کے برعکس سود کی بجائے حقیقی اثاثوں کی ملکیت پر مبنی ہوتے ہیں، اس لیے ان کے لیے استعمال ہونے والے تمام اثاثوں کی شناخت اور ملکیت ثابت کرنا ضروری ہے، جس کے تحت موٹرویز، سرکاری عمارتوں، پاور پلانٹس اور زمین کی قیمت سمیت ان پر کسی بھی قسم کے قرض یا دعوے کا مکمل ریکارڈ ایک مرکزی رجسٹری میں محفوظ کیا جائے گا۔ ذرائع کا کہنا ہے کہ وزارتِ خزانہ، سٹیٹ بینک، ایس ای سی پی اور لاء ڈویژن مشترکہ طور پر اس کا قانونی و شرعی فریم ورک تیار کریں گی، جسے حتمی بات چیت اور مشاورت کے لیے عالمی مالیاتی فنڈ (آئی ایم ایف) کو بھی بھیجا جائے گا۔