سلامتی کونسل میں پاکستان کی سعودیہ پر حوثی ملیشیا کے حملوں کی مذمت

پاکستان نے یمن کی خودمختاری، آزادی اور علاقائی سالمیت کے لیے اپنی غیر متزلزل حمایت کا اعادہ کرتے ہوئے سعودی عرب کے خلاف حوثی ملیشیا کے دہشت گرد حملوں کے فوری اور غیر مشروط خاتمے کا مطالبہ کیا ہے۔ اقوامِ متحدہ کی سلامتی کونسل میں قرارداد 2140 کے تحت عائد پابندیوں کی تجدید اور ماہرین کے پینل کے مینڈیٹ میں توسیع کے بعد خطاب کرتے ہوئے پاکستان کے مستقل نمائندے سید حیدر شاہ نے قرارداد کا خیرمقدم کیا اور برطانیہ کی تعمیری سفارتی کوششوں کو سراہا۔ پاکستانی سفیر نے مملکتِ سعودی عرب کی قیادت، حکومت اور برادر عوام کے ساتھ مکمل یکجہتی کا اظہار کرتے ہوئے کہا کہ اقوامِ متحدہ کے منشور اور بین الاقوامی قانون کے مطابق سعودی عرب کو اپنے علاقے اور شہریوں کے دفاع کا جائز حق حاصل ہے، جبکہ یمن کے امن کو خطرے میں ڈالنے والے عناصر کا احتساب ناگزیر ہے۔ سید حیدر شاہ نے اس بات پر بھی زور دیا کہ ماہرین کا پینل غیر جانب داری اور پیشہ ورانہ مہارت کے ساتھ ذمہ داریاں نبھائے اور اقوامِ متحدہ کی قیادت میں ایک ایسے جامع سیاسی عمل کو آگے بڑھایا جائے جو یمنی عوام کی ملکیت ہو، تاکہ خطے میں پائیدار امن اور انسانی بحران کے خاتمے کو یقینی بنایا جا سکے۔