یو اے ای کی ریاست فجیرہ میں خوفناک ٹریفک حادثہ، 14 افراد جاں بحق

متحدہ عرب امارات کی ریاست فجیرہ میں ایک خوفناک ٹریفک حادثے کے نتیجے میں 14 افراد جاں بحق اور 30 زخمی ہو گئے ہیں۔

اماراتی وزارتِ داخلہ کی جانب سے جاری کردہ بیان کے مطابق یہ اندوہناک حادثہ فجیرہ کی شاہراہ پر 18 گاڑیوں اور 5 ٹرکوں کے درمیان شدید تصادم کے باعث پیش آیا، جس کے نتیجے میں متعدد گاڑیوں کو شدید نقصان پہنچا۔

اماراتی وزارتِ داخلہ کا کہنا ہے کہ ہلاکتوں اور زخمیوں کی سامنے آنے والی تعداد فی الحال ابتدائی معلومات پر مبنی ہے، جبکہ حادثے کے فوری بعد پولیس، سول ڈیفنس اور خصوصی امدادی ٹیمیں موقع پر پہنچ گئیں اور بڑے پیمانے پر ریسکیو آپریشن جاری ہے۔