ارجنٹائن نے اپنی مسلح افواج کو دہشت گرد قرار دینے کا ایرانی اقدام مسترد کر دیا

ارجنٹائن کی وزارتِ خارجہ نے ایران کی جانب سے ملک کی بحریہ اور فضائیہ کو دہشت گرد تنظیموں کی فہرست میں شامل کرنے کے فیصلے کو سختی سے مسترد کرتے ہوئے اسے بے بنیاد اور مسلح افواج کے خلاف ناقابلِ قبول الزام قرار دیا ہے۔ ارجنٹائن کے سرکاری بیان میں کہا گیا ہے کہ اس کی بحریہ اور فضائیہ آئینی ادارے ہیں جو ملکی و بین الاقوامی قوانین کے تحت قومی خودمختاری کا دفاع کرتی ہیں۔ واضح رہے کہ ایران نے ایک روز قبل 2019ء کے ’قانونِ اقدامِ متقابل‘ کے تحت یہ فیصلہ ارجنٹائن کی جانب سے رواں سال اپریل میں سپاہ پاسدارانِ انقلاب (IRGC) کو دہشت گرد تنظیم قرار دینے کے ردِعمل میں کیا تھا، جبکہ دونوں ممالک کے درمیان 1994ء کے بیونس آئرس بم دھماکے کے معاملے پر طویل عرصے سے سفارتی کشیدگی چلی آ رہی ہے۔