بہاولپور: غیر ملکی خاتون پر مبینہ تشدد، مقدمہ درج، شوہر فرار، سسر گرفتار

بہاولپور میں 40 سالہ فلپائنی خاتون پر مبینہ تشدد کے معاملے میں تھانہ سمہ سٹہ پولیس نے متاثرہ غیر ملکی خاتون کی مدعیت میں باضابطہ مقدمہ درج کر لیا ہے۔

پولیس کارروائی کے دوران خاتون کے سسر صابر کو گرفتار کر لیا گیا ہے جبکہ اس کا 23 سالہ شوہر سکندر موقع سے فرار ہونے میں کامیاب ہو گیا۔ درج ایف آئی آر کے مطابق، فلپائنی خاتون کا شوہر اور سسر اس پر جسمانی تشدد کرتے تھے؛ خاتون کے موبائل فون مانگنے پر شوہر نے اس پر پاس کوڈ لگا دیا تھا اور مبینہ طور پر دونوں ملزمان خاتون کو بالوں سے پکڑ کر گھسیٹتے رہے۔

خاتون نے تشدد سے بچنے کے لیے ہمسائیوں کے گھر پناہ لی، جس کے بعد پولیس نے اطلاع ملتے ہی متاثرہ خاتون کو اپنی تحویل میں لے کر مقامی عدالت میں پیش کر دیا۔ عدالت نے پولیس کو فلپائنی خاتون کو حفاظت کے پیشِ نظر دارالامان منتقل کرنے کے احکامات جاری کر دیے ہیں۔ واضح رہے کہ متاثرہ خاتون گزشتہ سال دسمبر میں پسند کی شادی کر کے پاکستان آئی تھی اور اب اس نے اپنے ملک فلپائن واپس جانے کا مطالبہ کیا ہے۔