ناران اور گردونواح میں بارش، برفباری: بابوسر ٹاپ آمدورفت کیلئے بند

بالاکوٹ اور گردونواح میں وقفے وقفے سے بارش جبکہ وادی ناران، لولوسر جھیل، گٹی داس میڈوز اور بابوسر ٹاپ سمیت بالائی علاقوں میں مسلسل برفباری کے باعث علاقے میں شدید سردی لہر دوڑ گئی ہے۔

وادی ناران اور جھیل سیف الملوک میں گزشتہ چند گھنٹوں سے مسلسل برفباری کا سلسلہ جاری ہے، جس کے باعث پہاڑوں اور وادیوں نے برف کی سفید چادر اوڑھ لی ہے۔ موسم کی خرابی اور سڑکوں پر برف جمنے کی پیشِ نظر بابوسر ٹاپ کو ہر قسم کی آمدورفت کے لیے عارضی طور پر بند کر دیا گیا ہے۔

شدید موسم سرما کی آمد اور برفباری کے باعث بالائی علاقوں میں مقامی و سیاحتی سرگرمیاں بھی معطل ہو گئی ہیں۔ بڑاوئی اور بٹہ کنڈی میں واقع ہوٹلز، دکانیں اور پیٹرول پمپس آئندہ پانچ ماہ (اگلے سیاحتی سیزن) کے لیے مکمل طور پر بند کر دیے گئے ہیں۔