فیصل آباد: کرائے کے تنازع پر سیلز گرل پر تشدد، ملزم گرفتار

فیصل آباد کے کوہ نور پلازہ میں کرائے کے تنازع پر دکان کے مالک حامد نے سیلز گرل کو بدترین تشدد کا نشانہ بنا ڈالا۔ پولیس کے مطابق ملزم دکان کا کرایہ وصول کرنے گیا تھا، تاہم دکاندار کی عدم موجودگی پر مشتعل ہو کر اس نے وہاں موجود خاتون سیلز گرل پر ہاتھ اٹھایا۔ واقعے کا نوٹس لیتے ہوئے پولیس نے فوری کارروائی کرتے ہوئے ملزم حامد کو گرفتار کر لیا۔ پولیس اسٹیشن میں متاثرہ سیلز گرل نے بھی ہمت کا مظاہرہ کرتے ہوئے ملزم کے تھپڑ کا جواب تھپڑ سے دیا۔ واضح رہے کہ وزیراعلیٰ پنجاب مریم نواز نے واقعے کی مذمت کرتے ہوئے کہا تھا کہ کمزور اور مظلوم پر ہاتھ اٹھانے والے نتائج کے لیے تیار رہیں، صوبائی حکومت ہر صورت مظلوم کے ساتھ کھڑی ہوگی۔