پاکستان کا یوکرین تنازع کے حل کیلئے جنگ بندی، مذاکرات اور سفارتکاری پر زور

پاکستان نے اقوامِ متحدہ کی سلامتی کونسل (UNSC) کے اجلاس میں یوکرین تنازع کے حل کے لیے فوری جنگ بندی، بامقصد مذاکرات اور سفارت کاری پر زور دیا ہے۔ سلامتی کونسل میں خطاب کرتے ہوئے پاکستان کے مستقل مندوب سید حیدر شاہ نے یوکرین جنگ کی بڑھتی ہوئی شدت اور شہری ہلاکتوں پر گہری تشویش کا اظہار کیا۔ انہوں نے توانائی کی تنصیبات، ذرائع نقل و حمل اور تجارتی جہازوں کو نشانہ بنائے جانے پر تشویش ظاہر کرتے ہوئے دونوں فریقین پر زور دیا کہ وہ مزید کشیدگی سے گریز کریں اور بین الاقوامی قوانین کی پاسداری کو یقینی بنائیں۔ سید حیدر شاہ نے واضح کیا کہ یوکرین تنازع کا پرامن اور سفارتی حل ہی واحد قابلِ عمل اور ذمہ دارانہ راستہ ہے، اور پاکستان اس تنازع کے پائیدار حل کے لیے تمام بین الاقوامی سفارتی کوششوں کی حمایت جاری رکھے گا۔