ملکی معاشی ترقی کیلئے ڈسٹرکٹ اور سیکٹرل اکانومی پر توجہ ہے: ایس ایم تنویر

سربراہ یونائیٹڈ بزنس گروپ (UBG) ایس ایم تنویر نے کہا ہے کہ ملکی معیشت کی بحالی اور پائیدار ترقی کے لیے ڈسٹرکٹ اور سیکٹرل اکانومی کو تحرک دینے پر خصوصی توجہ دی جا رہی ہے۔

خیبر پختونخوا کے دارالحکومت پشاور میں بزنس کمیونٹی کے ایک پروقار اجتماع سے خطاب کرتے ہوئے ایس ایم تنویر نے واضح کیا کہ تمام متعلقہ ممبران کو پہلے 100 دن کا جامع روڈ میپ پیش کرنا ہوگا، جبکہ ہر تین ماہ بعد ان کی کارکردگی کی سخت مانیٹرنگ کی جائے گی۔ انہوں نے بتایا کہ فیڈریشن کے تحت کوئی غیر ضروری کمیٹی تشکیل نہیں دی جائے گی بلکہ منتخب ممبران ہی کمیٹیاں سنبھالیں گے۔

سربراہ یو بی جی نے خیبر پختونخوا کی امن و امان کی صورتِ حال میں بہتری کو سراہتے ہوئے کہا کہ گزشتہ تین سال کی کشیدگی سے صوبے کی معیشت کو شدید نقصان پہنچا ہے۔ انہوں نے تاجروں پر زور دیا کہ وہ اپنے اپنے چیمبرز کے ذریعے ملک کی معاشی ترقی کے لیے عملی وقت دیں اور معیشت کی بہتری کے مشترکہ ہدف کو یقینی بنائیں۔