آبنائے ہرمز میں دو آئل ٹینکر میں بارودی سرنگوں سے ٹکرا کر آگ لگ گئی

ایران کے پاسدارانِ انقلاب (IRGC) کی بحریہ نے دعویٰ کیا ہے کہ آبنائے ہرمز اور اس کے مشرقی سمندری علاقے میں 2 آئل ٹینکرز بارودی سرنگوں سے ٹکرانے کے بعد شدید آتشزدگی کا شکار ہو گئے ہیں۔ ایرانی بحریہ کے مطابق دونوں ٹینکروں نے اپنے نیویگیشن اور پوزیشننگ سسٹمز بند کر کے غير مجاز بحری راستوں سے گزرنے کی کوشش کی تھی، جس پر پاسدارانِ انقلاب نے خبردار کیا ہے کہ ایرانی ضوابط کی خلاف ورزی کرنے والے جہاز بارودی سرنگوں کے خطرے سے دوچار ہوں گے اور بحری جہاز امریکی سینٹرل کمانڈ کی ہدایات پر ہرگز انحصار نہ کریں۔ یہ بیان ایرانی صوبے ہرمزگان کے علاقوں قشم، سیرک، جاسک اور بندر عباس میں دھماکوں سے ملتی جلتی آوازیں سنے جانے کے بعد سامنے آیا ہے، تاہم پاسدارانِ انقلاب نے ہرمزگان کے دھماکوں اور ٹینکرز کے واقعات کا باہمی تعلق واضح نہیں کیا۔ واضح رہے کہ اس سے قبل امریکی سینٹ کام نے بحیرۂ عمان میں ایک کارگو جہاز کو روکنے کا بھی دعویٰ کیا تھا، مگر دونوں واقعات میں کسی براہِ راست ربط کی تصدیق نہیں ہو سکی ہے۔