فرانس میں مہنگائی، کم تنخواہوں، تعلیمی سہولتوں کی خرابی کیخلاف احتجاج جاری، ایک روزہ ہڑتال

فرانس میں بڑھتی ہوئی مہنگائی، کم تنخواہوں، عوامی خدمات میں کمی اور تعلیمی سہولیات کی بگڑتی ہوئی صورتحال کے خلاف مزدوروں، لیبر یونینز اور طلبہ نے ملک گیر احتجاج اور ایک روزہ مکمل ہڑتال کی ہے۔

اگرچہ فرانس کے مختلف شہروں میں احتجاجی مظاہرے مجموعی طور پر پرامن رہے، تاہم دارالحکومت پیرس اور لیون میں پولیس اور مظاہرین کے درمیان شدید جھڑپیں دیکھ دیکھنے میں آئیں۔ فرانسیسی وزارتِ داخلہ نے ملک بھر میں مظاہرین کی مجموعی تعداد 6 لاکھ بتائی ہے، جبکہ احتجاج کی کال دینے والی معروف سی جی ٹی (CGT) یونین نے دعویٰ کیا ہے کہ مظاہروں میں 16 لاکھ سے زائد افراد نے شرکت کی۔

اس ملک گیر ہڑتال کے باعث پیرس کا عالمی شہرت یافتہ سیاحتی مقام ایفل ٹاور بھی عوام کے لیے بند رہا، جبکہ توانائی کے شعبے کے کارکنان کی ہڑتال کی وجہ سے فرانس میں جوہری بجلی کی پیداوار میں نمایا ں کمی ہوئی۔ پیرس اور لیون میں پولیس نے مظاہرین کو منتشر کرنے کے لیے آنسو گیس کی شیلنگ کی۔ مظاہرین کا مطالبہ ہے کہ تنخواہوں میں فوری طور پر مہنگائی کے تناسب سے اضافہ کیا جائے اور تعلیمی و عوامی شعبوں کے لیے مزید سرکاری وسائل مختص کیے جائیں۔