روسی صدر کی ایران کیخلاف جنگ ختم کرانے کیلئے تعاون کی پیشکش

ایران کی سپریم نیشنل سکیورٹی کونسل کے سکریٹری محسن رضائی نے ماسکو میں روسی صدر ولادیمیر پیوٹن سے ایک انتہائی اہم ملاقات کی ہے، جس میں جاری کشیدگی اور جنگ کے بعد کے علاقائی سلامتی کے انتظامات پر تفصیلی گفتگو کی گئی۔

ملاقات کے دوران روسی صدر ولادیمیر پیوٹن نے ایران کے خلاف جارحیت اور جنگ کو ختم کرانے کے لیے اپنے مکمل تعاون کی پیشکش کر دی ہے۔ محسن رضائی نے بتایا کہ ایران کے سپریم لیڈر آیت اللہ خامنہ ای نے روسی صدر تک اپنا خصوصی پیغام جلد از جلد پہنچانے کی ہدایت کی تھی۔ انہوں نے اس بات کا بھی ذکر کیا کہ تہران میں منعقدہ حالیہ اجلاس میں پاکستان، ترکی اور سعودی عرب کے نمائندوں نے بھی شرکت کی تھی اور علاقائی استحکام کے لیے کوشاں ہیں۔

محسن رضائی کے مطابق صدر پیوٹن نے جنگ کے فوری اور پرامن خاتمے کے لیے ہر ممکن مدد کی یقین دہانی کرائی ہے اور روسی قیادت ایران پر امریکی اور اسرائیلی حملوں کو غیر منصفانہ جنگ قرار دیتی ہے۔ دونوں رہنماؤں نے خطے میں پائیدار سلامتی اور سفارتی توازن قائم کرنے کے لیے آئندہ کے لائحہ عمل پر بھی تبادلہ خیال کیا۔