پاکپتن میں مسافر بس اور ٹرالر میں خوفناک تصادم، 11 افراد جاں بحق، 33 زخمی

دیپالپور روڈ پر مسافر بس اور ٹرالر کے درمیان ہونے والے انتہائی ہولناک تصادم کے نتیجے میں 11 افراد جاں بحق جبکہ 33 سے زائد شدید زخمی ہو گئے۔

ریسکیو حکام کے مطابق یہ المناک حادثہ اس وقت پیش آیا جب ملتان سے لاہور جانے والی تیز رفتار مسافر بس 17 ایس پی کے قریب آلوؤں سے لدے ایک ٹرالر سے ٹکرا گئی، تصادم اتنا شدید تھا کہ بس موقع پر ہی الٹ گئی۔ جاں بحق ہونے والے افراد میں پیرا فورس اور پنجاب پٹرولنگ پولیس (PPP) کے اہلکار بھی شامل ہیں۔

حادثے کی اطلاع ملتے ہی ریسکیو 1122 کی متعدد ٹیموں نے موقع پر پہنچ کر بس میں پھنسے زخمی مسافروں اور لاشوں کو نکالنے کے لیے بڑے پیمانے پر ریسکیو آپریشن شروع کر دیا۔ واقعے کی خبر ملتے ہی ڈپٹی کمشنر آصف رضا اور ڈی پی او جاوید اقبال بھی جائے وقوعہ پر پہنچ گئے اور امدادی کارروائیوں کا جائزہ لیا۔ ضلعی انتظامیہ کے مطابق تمام زخمیوں کو فوری طبی امداد کی فراہمی کے لیے ڈسٹرکٹ ہیڈ کوارٹر ہسپتال میں ایمرجنسی نافذ کر دی گئی ہے۔