پنجاب کے دو حلقوں میں ضمنی انتخابات، پاک فوج اور رینجرز تعینات کرنے کی منظوری

وفاقی حکومت نے الیکشن کمیشن آف پاکستان کی درخواست پر پنجاب کے دو مختلف حلقوں میں ہونے والے ضمنی انتخابات کے دوران امن و امان کے قیام اور شفاف پولنگ کو یقینی بنانے کے لیے پاک فوج اور پنجاب رینجرز کی تعیناتی کی باضابطہ منظوری دے دی ہے۔ اس سلسلے میں وزارتِ داخلہ و انسداد منشیات نے نوٹیفکیشن جاری کر دیا ہے۔

وزارتِ داخلہ کے نوٹیفکیشن کے مطابق قومی اسمبلی کے حلقہ این اے-77 (گوجرانوالہ-I) اور صوبائی اسمبلی کے حلقہ پی پی-203 (ساہیوال-VI) میں 8 نومبر کو ضمنی انتخابات کا انعقاد کیا جا رہا ہے۔ دونوں حلقوں میں سیکیورٹی انتظامات کو حتمی شکل دینے کے لیے پاک فوج اور پنجاب رینجرز 7 سے 9 نومبر 2026ء تک فرائض سرانجام دیں گے۔

نوٹیفکیشن کی تفصیلات کے مطابق پنجاب رینجرز کو دوسرے درجے (Second-tier) کی رسپانس فورس اور پاک فوج کو تیسرے درجے (Third-tier) کی رسپانس فورس کے طور پر دستیاب رکھنے کی منظوری دی گئی ہے۔ یہ دونوں سیکیورٹی فورسز پولنگ اسٹیشنز کے باہر صرف اسٹینڈ بائی اور کسی بھی ناگہانی صورتحال سے نمٹنے کے لیے کوئیک رسپانس فورس (QRF) کے طور پر تاحکمِ ثانی فعال رہیں گی۔ الیکشن کمیشن کی جانب سے ستمبر اور اکتوبر 2026ء میں کی گئی سفارشات پر عملدرآمد کرتے ہوئے حکومت نے یہ منظوری دی ہے۔