پنجاب: دیہی خواتین کے روزگار کے لئے بڑا منصوبہ تیار، رجسٹریشن شروع

وزیراعلیٰ پنجاب مریم نواز شریف نے دیہی خواتین کو بااختیار بنانے اور برسرِ روزگار کرنے کے لیے ‘شی تھریڈ’ کے نام سے جدید ٹیکسٹائل ٹریننگ پروگرام کا آغاز کر دیا ہے، جس کے تحت جون تک 2500 دیہی خواتین کو انڈسٹریل سلائی مشین آپریٹر اور اپیرل سپروائزر کی مارکیٹ بیسڈ تربیت دی جائے گی۔ محکمہ ویمن ڈویلپمنٹ کے زیرِ اہتمام شروع کیے گئے اس 3 ماہ کے کورس کے دوران 18 سے 45 سال کی میٹرک پاس خواتین کو مفت تدریس اور پریکٹیکل ٹریننگ کے ساتھ ماہانہ 15 ہزار روپے وظیفہ فراہم کیا جائے گا جبکہ تربیت کی تکمیل کے بعد ٹیکسٹائل انڈسٹری میں ملازمت کے مواقع بھی دیے جائیں گے۔ پروگرام کی ابتدائی رجسٹریشن ملتان روڈ لاہور کے قریب واقع شاہکام انڈسٹری میں شروع ہو چکی ہے۔