وفاقی آئینی عدالت کا اہم فیصلہ: حتمی فیصلوں کو بار بار چیلنج کرنے کی اجازت نہیں دی جا سکتی

وفاقی آئینی عدالت نے اہم قانونی اصول طے کرتے ہوئے قرار دیا ہے کہ حتمی ہو جانے والے عدالتی فیصلوں کو بار بار چیلنج کرنا اور ایک ہی تنازع کو مختلف فورمز پر اٹھانا عدالتی عمل کے ناجائز استعمال کے مترادف ہے۔ جسٹس روزی خان بریچ اور جسٹس سید ارشد حسین شاہ پر مشتمل دو رکنی بینچ نے بھکر میں لڑکیوں کے سکول کی تعمیر کے لیے زمین کی ملکیت سے متعلق کیس میں انوری بی بی کے ورثاء کی درخواستِ اپیل مسترد کرتے ہوئے لاہور ہائیکورٹ کا فیصلہ برقرار رکھا۔ جسٹس سید ارشد حسین شاہ کے تحریر کردہ فیصلے میں واضح کیا گیا کہ جب کسی معاملے پر سپریم کورٹ اور کنسولیڈیشن حکام کا فیصلہ حتمی ہو جائے تو اسے دوبارہ نہیں کھولا جا سکتا، سوائے فراڈ یا دائرہ اختیار کی سنگین غلطی کے۔ عدالت نے زور دیا کہ فیصلوں کو حتمی حیثیت دینا نظامِ انصاف، قانونی استحکام اور قانون کی بالادستی کے لیے ناگزیر ہے۔