افغان حکومت اپنی سرزمین دہشت گردوں کو استعمال کرنے دے رہی ہے: پاکستان

اقوامِ متحدہ کی انسانی حقوق کونسل کے انٹرایکٹو ڈائیلاگ میں پاکستان کے نمائندے محمد جواد اجمل نے افغانستان میں دہشت گرد تنظیموں کی مسلسل موجودگی اور طالبان کی مبینہ سرپرستی پر شدید تشویش کا اظہار کرتے ہوئے انکشاف کیا ہے کہ گزشتہ 3 برسوں میں افغان سرزمین سے ہونے والے حملوں میں 4,700 سے زائد پاکستانی جاں بحق ہو چکے ہیں۔ انہوں نے کہا کہ طالبان حکومت بیرونی عناصر کی پشت پناہی سے سرگرم گروہوں کی سرگرمیاں روکنے میں ناکام رہی ہے جو پاکستان کی سلامتی کے لیے خطرہ ہیں۔ دوسری جانب اقوامِ متحدہ کے خصوصی نمائندے رچرڈ بینیٹ نے جنرل اسمبلی کو بتایا کہ اقتدار میں آنے کے 5 سال بعد بھی طالبان نے انسانی حقوق اور خصوصاً خواتین پر عائد پابندیوں کو ختم کرنے کے لیے کوئی قدم نہیں اٹھایا۔ پاکستان نے او آئی سی کے اسلام آباد اعلامیے کا حوالہ دیتے ہوئے طالبان کی جانب سے خواتین کے حقوق پر عائد قدغنوں کو اسلامی اقدار کے منافی قرار دیا، جبکہ اقوامِ متحدہ کے نمائندے نے عالمی برادری سے مطالبہ کیا کہ پالیسیاں بدلنے تک طالبان کے ساتھ روابط معمول پر نہ لائے جائیں۔