بھارت سے سندھ طاس معاہدے پر قانونی جنگ جاری رکھیں گے: اٹارنی جنرل

اٹارنی جنرل آف پاکستان منصور اعوان نے لاہور میں ‘انڈس واٹرز ٹریٹی اینڈ نیشنل سیکیورٹی’ سیمینار سے خطاب کرتے ہوئے اعلان کیا ہے کہ پاکستان بھارت کے ساتھ سندھ طاس معاہدے کی پاسداری کے لیے عالمی فورمز پر قانونی جنگ جاری رکھے گا۔ انہوں نے واضح کیا کہ معاہدے کے تحت کوئی بھی ملک یکطرفہ طور پر اس سے انحراف یا ترمیم نہیں کر سکتا، جبکہ اس معاملے پر بھارت کا موجودہ رویہ شدید تشویشناک ہے۔ اٹارنی جنرل نے بتایا کہ پاکستان اپنی زراعت کا 90 فیصد حصہ آبپاشی کے نظام کے ذریعے پورا کرتا ہے، اس لیے پانی کے بہاؤ میں معمولی رکاوٹ بھی ملک کے زرعی نظام اور عام شہریوں کو متاثر کر سکتی ہے، جس کے باعث آبی وسائل کا تحفظ قومی سلامتی اور بقا کا معاملہ ہے۔