بھارتی تنقید مکہ دفاعی معاہدے کی اہمیت کم نہیں کر سکتی: ترک وزیر خارجہ

ترکیہ کے وزیر خارجہ حاقان فیدان نے کہا ہے کہ مکہ دفاعی اتحاد کے خلاف بھارتی ذرائع ابلاغ کی منفی مہم اس دفاعی اتحاد اور سہ فریقی تعاون سے متعلق نئی دہلی حکومت کے گہرے خدشات کی واضح عکاسی کرتی ہے۔

ایک ترک ٹی وی چینل کو تفصیلی انٹرویو دیتے ہوئے ترکیہ کے وزیر خارجہ حاقان فیدان نے دوٹوک الفاظ میں کہا کہ پاکستان، ترکیہ اور سعودی عرب کے درمیان بڑھتے ہوئے تزویراتی (اسٹریٹجک) تعاون کے امکانات نے بھارت کو شدید بے چین کر دیا ہے۔ انہوں نے زور دے کر کہا کہ بھارت ’مکہ دفاعی اتحاد‘ کو بے بنیاد تنقید اور غلط معلومات کی ترویج کے ذریعے ہرگز کمزور نہیں کر سکتا۔ پاکستان، ترکیہ اور سعودی عرب کے مابین یہ تعاون خطے کی سلامتی کے لیے ایک انتہائی اہم سٹریٹجک پیش رفت ہے، جس کے مثبت اور دور رس اثرات وقت کے ساتھ ساتھ پوری دنیا کے سامنے آئیں گے۔

ترک وزیر خارجہ نے مزید کہا کہ اگرچہ بھارت اس نئے اتحاد پر تنقید کرنے کا حق محفوظ رکھتا ہے اور وہ اعتراضات بھی اٹھا سکتا ہے، تاہم وہ اس اتحاد کی حقیقی اسٹریٹجک اہمیت اور خطے میں اس کے اثرات کو کسی بھی صورت نظرانداز نہیں کر سکتا۔