امریکہ میں میڈیکیڈ سے 34 لاکھ ڈالر کا فراڈ: نیویارک کی عدالت نے پاکستانی نژاد میاں بیوی کو قید کی سزا سنا دی

امریکہ کی ریاست نیویارک کی اورنج کاؤنٹی ڈسٹرکٹ کورٹ نے میڈیکیڈ صحت پروگرام سے 34 لاکھ ڈالر سے زائد کا فراڈ کرنے کے الزام میں پاکستانی نژاد امریکن جوڑے کو قید اور بھاری جرمانے کی سزا سنا دی ہے۔ اورنج کاؤنٹی ڈسٹرکٹ اٹارنی آفس کے مطابق یہ کاؤنٹی کی تاریخ میں میڈیکیڈ فراڈ کا سب سے بڑا کیس ہے۔ عدالتی فیصلے کے تحت 45 سالہ روہیل راجہ کو 6 سے 18 سال قید جبکہ ان کی اہلیہ 45 سالہ شما عالم کو 6 ماہ جیل اور 5 سال پروبیشن کی سزا سنائی گئی ہے۔ استغاثہ کے مطابق ملزمان نے 2020 سے 2024 کے دوران دو ٹرانسپورٹیشن کمپنیوں کے ذریعے ان جعلی طبی سفر کی مد میں سرکاری فنڈز وصول کیے جو کبھی فراہم ہی نہیں کیے گئے تھے۔ مجرم قرار دیے جانے پر میاں بیوی نے 4 لاکھ ڈالر ہرجانہ فوری جمع کرایا، جبکہ عدالت نے انہیں بقایا تقریباً 30 لاکھ ڈالر بھی واپس کرنے کا حکم دیا ہے۔