اوگرا نے اکتوبر کے لیے ایل این جی کی قیمتوں میں 15 فیصد تک اضافہ کردیا

آئل اینڈ گیس ریگولیٹری اتھارٹی (اوگرا) نے ماہ اکتوبر 2026 کے لیے درآمدی ری گیسیفائیڈ لیکویفائیڈ نیچرل گیس (آر ایل این جی) کی قیمتوں میں 13 سے 15 فیصد تک کا نمایاں اضافہ کر دیا ہے۔

اوگرا کی جانب سے جاری کردہ نوٹیفکیشن کے مطابق، سوئی ناردرن گیس پائپ لائنز لمیٹڈ (ایس این جی پی ایل) کے ٹرانسمیشن سسٹم کے لیے آر ایل این جی کی قیمت میں 13.89 فیصد اضافہ کیا گیا ہے، جس کے بعد نئی قیمت 15.9357 ڈالر فی ایم ایم بی ٹی یو مقرر ہو گئی ہے۔ اسی طرح ایس این جی پی ایل کے ڈسٹری بیوشن سسٹم کے لیے قیمت میں 14.01 فیصد اضافے کے بعد نئی قیمت 17.3259 ڈالر فی ایم ایم بی ٹی یو ہو گئی ہے۔

دوسری جانب، سوئی سدرن گیس کمپنی (ایس ایس جی سی ایل) کے ٹرانسمیشن سسٹم کے لیے آر ایل این جی کی قیمت میں 15.25 فیصد اضافہ کیا گیا ہے جس سے نئی قیمت 14.5339 ڈالر فی ایم ایم بی ٹی یو مقرر ہوئی ہے، جبکہ ایس ایس جی سی ایل کے ڈسٹری بیوشن سسٹم کے لیے قیمت میں 15.27 فیصد اضافے کے بعد نئی قیمت 16.3959 ڈالر فی ایم ایم بی ٹی یو تک پہنچ گئی ہے۔

اوگرا کا کہنا ہے کہ آر ایل این جی کی ان نئی قیمتوں کا اطلاق یکم اکتوبر 2026 سے ہوگا، اور قیمتوں کا یہ تعین وفاقی حکومت کی منظور شدہ پالیسی گائیڈ لائنز کے تحت کیا گیا ہے۔ اتھارٹی کے مطابق اکتوبر کے لیے آر ایل این جی کی ان قیمتوں کا حساب پاکستان اسٹیٹ آئل (پی ایس او) کے دو درآمدی کارگوز کی بنیاد پر لگایا گیا ہے۔