پرانے ملازمین قومی ایئرلائن کا سرمایہ ہیں، ادارہ انہیں دھتکار کر نہ رکھے: عدالت

وفاقی آئینی عدالت کے 2 رکنی بینچ نے جسٹس حسن اظہر رضوی کی سربراہی میں پی آئی اے کے ریٹائرڈ ملازمین کی طبی سہولیات سے متعلق کیس کی سماعت کرتے ہوئے قومی ایئرلائن انتظامیہ کو باضابطہ اور جامع جواب پیش کرنے کی ہدایت کی ہے۔ سماعت کے دوران جسٹس حسن اظہر رضوی نے ریمارکس دیے کہ پی آئی اے اپنے ان سابق ملازمین کی خدمات کا پاس رکھے جنہوں نے ادارے کے لیے اپنا سنہرا وقت دیا، اور اس معاملے کو تکنیکی نکات کے بجائے انسانی ہمدردی کی بنیاد پر دیکھا جائے۔ فاضل جج نے ماضی میں میڈیکل الاؤنس کے غلط استعمال کی مذمت کرتے ہوئے واضح کیا کہ فراڈ کرنے والوں کے خلاف سخت کارروائی کی جائے لیکن جائز ملازمین کا حق نہ مارا جائے۔ دوسری جانب پی آئی اے کے وکیل نے عدالت کو بتایا کہ طبی سہولیات کا نظام شفاف بناتے ہوئے ریٹائرڈ ملازمین کی سالانہ میڈیکل حد 2.5 لاکھ سے بڑھا کر 5 لاکھ روپے کر دی گئی ہے۔