سکھیکی: مسافر بس سیم نالے میں گر گئی، 5 افراد جاں بحق، 40 زخمی

حافظ آباد کے قریب سکھیکی کے مقام پر لاہور سے چنیوٹ جانے والی ایک مسافر بس بے قابو ہو کر سیم نالے میں جا گری، جس کے نتیجے میں کم از کم 5 افراد جاں بحق اور 40 مسافر شدید زخمی ہو گئے ہیں۔

ریسکیو ذرائع کے مطابق یہ افسوسناک حادثہ اس وقت پیش آیا جب مسافر بس لاہور سے مسافروں کو لے کر چنیوٹ کی طرف رواں دواں تھی۔ ابتدائی تحقیقات اور ذرائع کے مطابق حادثہ مبینہ طور پر بس کے ڈرائیور کو دورانِ سفر غنودگی یا نیند آنے کے باعث پیش آیا، جس کی وجہ سے ڈرائیور گاڑی پر قابو نہ رکھ سکا۔ حادثے کے وقت بس میں تقریباً 65 مسافر سوار تھے۔

حادثے کی اطلاع ملتے ہی ریسکیو 1122 اور ضلعی انتظامیہ کی ٹیمیں فوری طور پر جائے وقوعہ پر پہنچ گئیں اور امدادی کارروائیاں شروع کر دیں۔ ریسکیو اہلکاروں نے بس کو سیم نالے سے نکال کر امدادی سرگرمیاں انجام دیں، جبکہ تمام زخمیوں کو فوری طور پر تحصیل ہیڈ کوارٹر اسپتال پنڈی بھٹیاں منتقل کیا جا رہا ہے جہاں انہیں طبی امداد فراہم کی جا رہی ہے۔ حکام کے مطابق جائے وقوعہ پر امدادی کارروائیاں تاحال جاری ہیں، اور بعض مسافروں کے حادثے کے بعد سے تاحال لاپتہ ہونے کی اطلاعات بھی موصول ہو رہی ہیں۔