ایک روز کی کمی کے بعد سونے کی قیمت میں پھر بڑا اضافہ

ایک روز کی عارضی کمی کے بعد عالمی اور مقامی صرافہ بازاروں میں سونے اور چاندی کی قیمتوں میں ایک بار پھر بڑا اضافہ دیکھنے میں آیا ہے۔ آل پاکستان صرافہ ایسوسی ایشن کے مطابق ملکی مارکیٹ میں 24 قیراط فی تولہ سونے کی قیمت 3,500 روپے کے بڑے اضافے کے ساتھ 4 لاکھ 25 ہزار 636 روپے کی نئی بلند ترین سطح پر پہنچ گئی ہے، جبکہ 10 گرام سونا 3,001 روپے مہنگا ہو کر 3 لاکھ 64 ہزار 914 روپے کا ہو گیا ہے۔ دوسری جانب عالمی مارکیٹ میں فی اونس سونا 35 ڈالر کے اضافے کے ساتھ 4,031 ڈالر کی سطح پر درج کیا گیا۔ سونے کے ساتھ ساتھ فی تولہ چاندی کی قیمت بھی 61 روپے بڑھ کر 5,854 روپے ہو گئی ہے۔