اسرائیل میں انتخابات کیلئے پولنگ کا وقت ختم، ووٹوں کی گنتی جاری

اسرائیل میں عام انتخابات کے لیے پولنگ کا وقت ختم ہونے کے بعد ووٹوں کی گنتی کا سلسلہ تیزی سے جاری ہے، تاہم ابتدائی ایگزٹ پولز کے مطابق ملک میں کوئی بھی واضح فاتح سامنے نہیں آ سکا ہے۔

اسرائیلی چینل 12 کے ایگزٹ پول کے مطابق وزیراعظم بنجمن نیتن یاہو کی ‘لیکوڈ پارٹی’ پارلیمنٹ میں سب سے بڑی جماعت بن کر ابھرتی دکھائی دے رہی ہے، جو 120 رکنی پارلیمنٹ میں سے 24 نشستیں حاصل کر سکتی ہے؛ جبکہ نیتن یاہو کے اہم حریف اور سابق فوجی سربراہ گادی آئزن کوٹ کی قیادت والی پارٹی کے 22 نشستیں جیتنے کا امکان ہے۔ دوسری جانب، اسرائیلی چینل 11 کے ایگزٹ پول نے اس کے برعکس یہ اشارہ دیا ہے کہ آئزن کوٹ کی قیادت والا بلاک نیتن یاہو کے بلاک سے بڑا ہو سکتا ہے۔ اس صورتحال پر تبصرہ کرتے ہوئے گادی آئزن کوٹ نے ایگزٹ پولز کے نتائج پر ردعمل ظاہر کرتے ہوئے کہا کہ یہ اعداد و شمار واضح طور پر یہ ثابت کرتے ہیں کہ اب اسرائیلی عوام کا وزیراعظم نیتن یاہو پر سے اعتماد مکمل طور پر اٹھ چکا ہے۔

واضح رہے کہ اسرائیلی پارلیمنٹ (کنیست) کی کل 120 نشستوں میں سے حکومت بنانے کے لیے کسی بھی جماعت یا اتحاد کو کم از کم 61 نشستوں کی سادہ اکثریت درکار ہوتی ہے۔ مختلف خبر رساں اداروں کے مطابق ابتدائی جائزوں سے ظاہر ہوتا ہے کہ نہ تو نیتن یاہو اور نہ ہی ان کے حریف آئزن کوٹ کو حکومت سازی کے لیے مطلوبہ واضح اکثریت ملتی نظر آرہی ہے۔ انتخابی نتائج کے حتمی اعلان میں کئی دن لگ سکتے ہیں، اور سیاسی تعطل کا یہ طویل دورانیہ بالآخر نیتن یاہو کے حق میں جا سکتا ہے کیونکہ اس دوران انہیں نگراں وزیراعظم کی حیثیت سے اقتدار میں برقرار رہنے کا موقع مل جائے گا۔