اردن میں یمن کا مسافر طیارہ طوفان میں پھنس گیا، ژالہ باری سے شیشے ٹوٹ گئے

یمن کے عدن ایئرپورٹ سے اردن کے دارالحکومت عمان جانے والی یمنی ایئروویز کی پرواز IY-648 شدید موسمی خرابی، تیز ہواؤں کے خطرناک جھٹکوں اور شدید ژالہ باری کے باعث ایک بڑے فضائی حادثے سے بال بال بچ گئی ہے۔

پرواز کے دوران اچانک ہونے والی شدید ژالہ باری کے نتیجے میں ایئربس A320 طیارے کی نوز (مقابل کا حصہ) اور کاک پٹ کی ونڈ شیلڈز (شیشوں) کو شدید نقصان پہنچا۔ اس انتہائی کٹھن اور ہنگامی صورتحال کے باوجود، طیارے کے کپتان باصم فرید اور ان کے عملے نے انتہائی پروفیشنل ازم، پیشہ ورانہ مہارت اور شجاعت کا مظاہرہ کرتے ہوئے نہ صرف جہاز کا کنٹرول سنبھالے رکھا بلکہ اسے بحفاظت اردن کے عمان ایئرپورٹ پر اتارنے میں بھی کامیاب رہے۔ ایئرلائن کے ترجمان حاتم الشعابی نے اس واقعے کی تصدیق کرتے ہوئے بتایا کہ خوش قسمتی سے طیارے میں سوار تمام مسافر اور عملے کے ارکان بالکل محفوظ ہیں۔ حادثے کا شکار ہونے والے اس طیارے کو عمان ایئرپورٹ پر گراؤنڈ کر دیا گیا ہے، جبکہ مسافروں کی واپسی اور عمان سے عدن کی اگلی پرواز کے لیے ایک متبادل طیارے کا فوری بندوبست کر دیا گیا ہے۔