تیسرا روس افریقہ سربراہی اجلاس آج شروع ہوگا، پوتن سمیت متعدد عالمی رہنما شرکت کریں گے

روس کے دارالحکومت ماسکو میں تیسرا روس-افریقہ سربراہی اجلاس اور اقتصادی و انسانی ہمدردی فورم کا باضابطہ آغاز ہو گیا ہے، جس میں 48 افریقی ممالک کے وفود شریک ہیں اور جن میں سے 22 ممالک کی نمائندگی براہِ راست سربراہانِ مملکت کر رہے ہیں۔

ماسکو کے تاریخی ’گوستینی دوور‘ میں شروع ہونے والے اس دو روزہ اہم اجلاس کا مرکزی موضوع امن، سلامتی اور ترقی کے لیے روس اور افریقی ممالک کے مابین شراکت داری کو مزید فروغ دینا ہے۔ افتتاحی تقریب سے روسی صدر ولادیمیر پوتن اور افریقی یونین کی موجودہ صدارت کرنے والے ملک برونڈی کے صدر ایوارست ندایشیمیے نے خطاب کیا۔ تقریب کے دوران دونوں رہنماؤں نے اقتصادی تعلقات، توانائی، زرعی پیداوار، بنیادی ڈھانچے کی ترقی اور سرمایہ کاری کے نئے مواقع پر توجہ مرکوز کرنے کا عزم ظاہر کیا۔ سربراہی اجلاس کی مرکزی کارروائی گرینڈ کریملن پیلس میں ہوگی، جہاں صدر پوتن اور افریقی رہنما عالمی سیاسی و اقتصادی نظام میں تبدیلیوں، کثیر قطبی دنیا کے قیام اور بین الاقوامی اداروں میں افریقی ممالک کے موثر کردار پر تفصیلی تبادلہ خیال کریں گے۔ اس دوران روسی صدر کی تقریباً 20 افریقی رہنماؤں (بشمول مصر کے صدر عبدالفتاح السیسی اور ایتھوپیا کے وزیراعظم ابی احمد) کے ساتھ دوطرفہ ملاقاتیں بھی شیڈول ہیں۔

روسی حکام کے مطابق روس اور افریقی ممالک کے باہمی اقتصادی تعلقات میں حالیہ برسوں کے دوران نمایاں اضافہ دیکھا گیا ہے، اور سال 2025 میں دوطرفہ تجارتی حجم 27 ارب امریکی ڈالر سے تجاوز کر چکا ہے۔ روس افریقی ممالک کو اناج، معدنی کھادوں، توانائی کی مصنوعات اور صنعتی سازوسامان فراہم کرنے والے اہم شراکت داروں میں شامل ہے۔ اعداد و شمار کے مطابق 2025 میں افریقی ممالک کو 1 کروڑ 80 لاکھ ٹن سے زائد اناج فراہم کیا گیا، جبکہ رواں سال کے پہلے نو ماہ میں یہ مقدار 1 کروڑ 30 لاکھ ٹن رہی۔ اجلاس کے اختتام پر روس اور افریقی ممالک کے درمیان تعاون سے متعلق مشترکہ اعلامیے، مصنوعی ذہانت میں اشتراک اور 2027 سے 2029 تک شراکت داری کے عملی منصوبے سمیت 30 سے زائد اہم معاہدوں اور مفاہمتی یادداشتوں پر دستخط کیے جانے کا امکان ہے۔