جنوبی وزیرستان میں افغانستان کی دراندازی، شہری آبادی پر گولا گرنے سے ایک جاں بحق، 5 زخمی

خیبر پختونخوا کے سرحدی علاقے انگور اڈہ میں پاک افغان سرحد پر فائرنگ اور گولہ باری کا ایک افسوسناک واقعہ پیش آیا ہے، جس کے نتیجے میں ایک شہری جاں بحق جبکہ ایک ہی خاندان کے پانچ افراد شدید زخمی ہو گئے ہیں۔

سکیورٹی ذرائع کے مطابق یہ اشتعال انگیز کارروائی افغان طالبان رجیم کی جانب سے کی گئی، جنہوں نے بلااشتعال شہری آبادی کو براہِ راست نشانہ بنایا۔ گولہ باری کے دوران ایک مارٹر گولا براہِ راست ایک رہائشی مکان پر آ گرا، جس سے یہ جانی نقصان ہوا۔ اس حملے کے بعد مقامی شہریوں میں شدید غم و غصہ پایا جاتا ہے۔ دوسری جانب، سکیورٹی ذرائع نے تصدیق کی ہے کہ پاک فوج نے اس افغان جارحیت کا فوری اور مؤثر جواب دیا ہے، اور پاکستانی افواج کی بھرپور جوابی کارروائی کے نتیجے میں افغان فورسز کی متعدد چیک پوسٹوں کو مکمل طور پر تباہ کر دیا گیا ہے۔ سکیورٹی ذرائع کا کہنا ہے کہ پاک افغان سرحد پر تعینات پاکستانی سکیورٹی فورسز کے جوان ملک کی جغرافیائی حدود کے دفاع اور کسی بھی ممکنہ جارحیت کا منہ توڑ جواب دینے کے لیے ہر وقت پوری طرح تیار ہیں